ខេត្តសៀមរាប ៖ ឯកឧត្តម ឧត្តមសេនីយ៍ឯក ខៀវ ឆេន រដ្ឋលេខាធិការ ក្រសួងការពារជាតិ និងជាសមាជិកក្រុមការងាររាជរដ្ឋាភិបាលចុះមូល ដ្ឋាន ខេត្តសៀមរាប នៅព្រឹកថ្ងៃទី១៦ខែធ្នូ ឆ្នាំ២០២៥នេះ បានអញ្ជើញចុះជួបសំណេះសំណាលនិងនាំយកអំណោយចែកជូនបងប្អូនប្រជាពលរដ្ឋដែលជាជនភាសសឹក ៦០០គ្រួសារ ដែលកំពុងស្នាក់នៅមណ្ឌលសុវត្ថិភាព ស្រុកស្រីស្នំ ខេត្តសៀមរាប អមដំណើរដោយឯកឧត្តម លន់ សុធី ប្រធានក្រុមការងាររាជរដ្ឋាភិបាលចុះជួយស្រុកស្រីស្នំ ឯកឧត្តមឧត្តម ឧត្តមសេនីយ៍ឯកឧត្តម ស ថាវី អនុរដ្ឋលេខាធិការក្រសួងការពារជាតិ និងជាប្រធានក្រុមការងារថ្នាក់ជាតិចុះជួយមូលដ្ឋានស្រុកជីក្រែង ខេត្តសៀមរាប លោកឧត្តមសេនីយ៍ទោ ខូវ ឆាយ នាយកមជ្ឈម ណ្ឌលកីឡានៃកងយុទ្ធពលខេមរភូមិន្ទនិងលោកជំទាវផងដែរ។ ហើយអំណោយដែលចែកជូនដល់បងប្អូនប្រជាពលរដ្ឋជនភាសិកនាពេលនេះ រួមមានទឹកសុទ្ធកម្ពុជាដបធំចំនួន ១០០ កេះ កៅស៑ូតង់ចំនួន ២០តង់ ទឹកផ្លែឈើចំនួន ៨០កេះ និងអង្ក ៦០០កញ្ចប់ផងដែរ។
មានប្រសាសន៍សំណេះ សំណាល នាក្នុងឱកាសនោះ ឯកឧត្តម ឧត្តមសេនីយ៍ឯក ខៀវ ឆេន រដ្ឋលេខាធិការ ក្រសួង ការពារជាតិ និងជាសមាជិកក្រុមការងាររាជ រដ្ឋាភិបាលចុះមូលដ្ឋានខេត្តសៀមរាប
បានមានប្រសាន៍ថា កម្ពុជាយើង ត្រូវការសន្តិភាព និងមិនចង់បានសង្គ្រាមនោះឡើយ តែខាងភាគីទាហានថៃ រំលោភបំពានម្តងហើយ ម្តងទៀត ធ្វើឱ្យយើងរស់នៅដោយមិនបានសុខសាន្ត យើងគ្មានជម្រើសទេ ព្រោះថៃបាញ់សង្គ្រប់មកលើយើង ហើយកងកំលាំងយើងក៏ត្តូវការប្រើសិទ្ឋិបាញ់តបតការពារខ្លួន និងដើម្បីការពារអធិបតេយ្យភាពបូរណភាពទឹកដីពីការរំ លោភ បំពានមកលើយើងវិញផងដែរ។
ទង្វើរបស់កងទ័ពថៃ បានគំរាមកំហែងបំផ្លិចបំផ្លាញហេដ្ឋារចនាសម្ព័ន្ឋស៊ីវិល ដូចជាទីវត្ដអារាម សាសនា ផ្ទះសម្បែង សាលារៀន និងប្រាសាទនានាជាដើម។
ឯកឧត្តម មានប្រសាសន៍ថា ផលវិបាកនៃសង្គ្រាម បានបង្កមហន្តរាយ បំផ្លិចបំផ្លាញទ្រព្យសម្បត្តិ និងសោកនាដកម្ម ផ្ដាច់ជីវិតមិនរើសមុខ ទាំងទាហាន និងជនស៊ីវិលស្លូតត្រង់។
ប្រជាពលរដ្ឋត្រូវបង្ខំចិត្តភៀសខ្លួន ចាកចេញពីផ្ទះសម្បែង ទ្រព្យសម្បត្តិ សត្វចិញ្ចឹមដែលមិនអាចយកមកជាមួយបាន។ ទុក្ខលំបាកនេះធ្វើឱ្យយើងទាំងអស់គ្នាយល់យ៉ាងច្បាស់តម្លៃនៃសន្តិភាព។
ឯកឧត្តមមានប្រសាសន៍បន្តទៀតថា នៅក្នុងគ្រាដ៏លំបាកនេះ យើងត្រូវរួមគ្នាក្នុងស្មារតីរួម យកចិត្តទុកដាក់ជួយគ្នា ចែករំលែកទៅវិញទៅមកទាំងសម្ភារ និងស្មារតី ជាមួយគ្នានេះ ប្រមុខរាជរដ្ឋាភិបាល និងអាជ្ញាធរគ្រប់លំដាប់ថ្នាក់ តែងតែគិតគូរដោះស្រាយពីទុក្ខលំបាកនោះ ដោយមិនទៅណាចោល និងនៅជាមួយប្រជាជនជានិច្ច។ ក៏បានថ្លែងលើកទឹកចិត្ត និងអរគុណដល់គ្រួសារបងប្អូនដែលមានកូន មានប្ដីជាកងទ័ពកំពុងបំពេញភារកិច្ច ដើម្បីការពារអធិបតេយ្យភាព និងបូរណភាពទឹកដីជាកេរដូនតាយើងបានការពារទុកឱ្យដល់សព្វថ្ងៃ។
ប្រជាពលរដ្ឋកម្ពុជាគ្រប់ៗរូបមានកាតព្វកិច្ច និងមានសិទ្ធិការពារបូរណភាពទឹកដីទាំង អស់គ្នា ហើយកម្ពុជាគ្រាន់តែចង់រក្សាការពារនូវអ្វីដែលជាកេរដូនតាខ្មែរដែលនៅសល់បច្ចុប្បន្នឱ្យស្ថិតស្ថេរគង់វង្សដោយយើងមិនចង់បានរបស់អ្នកណានោះឡើយ៕
(ដោយ លោក សែម ប៊ុនធឿន)
