(បន្ទាយមានជ័យ)៖ អនុវត្តតាមអនុសាសន៍ដ៏ដ៏ខ្ពង់ខ្ពស់របស់ ឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិនៅរសៀលថ្ងៃទី៣០ខែធ្នូឆ្នាំ២០២៥លោកឧត្ដមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យបានចាត់តាំងលោកឧត្ដមសេនីយ៍ត្រី វង្ស វិត ស្នងការរងផែនការងារធនធានមនុស្សដឹកនាំកម្លាំងនគរបាលចូលរួមគោរពវិញ្ញាណក្ខន្ធ និងបំពាក់កំរងផ្កាដល់សពវីរយុទ្ធជនពលីជីវិតនៅសមរភូមិប្រយុទ្ធជាសត្រូវឈ្លានពានទឹកដីក្នុងភូមិសាស្ត្រខេត្តបន្ទាយមានជ័យចំនួន៣នាក់។
សពត្រូវបានតម្កល់ធ្វើបុណ្យតាមប្រពៃណីនៅវត្តគិរីជុំចំការខ្នុរ ស្ថិតនៅភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។
ជាចុងក្រោយលោកឧត្ដមសេនីយ៍ត្រី វង្ស វិត ស្នងការរងផែនការងារធនធានមនុស្សបានពាំនាំការចូលរួមមរណទុក្ខពីសំណាក់លោកឧត្ដមសេនីយ៍ទោស្នងការ និងរូបលោកផ្ទាល់ចំពោះការបាត់បង់នូវ ប្តី ឪពុក ជាទីគោរពស្រឡាញ់និងបាននាំយកថវិការបស់ស្នងការដ្ឋាននគរបាលខេត្តបន្ទាយមានជ័យទៅចូលរួមបុណ្យដល់ក្រុមគ្រួសារសពដេីម្បីយកទៅចាត់ចែងក្នុងកម្មវិធីបុណ្យផងដែរ៕
(ដោយ លោក យ៉េ សុខជា)
