(ខេត្តព្រះសីហនុ)ធំក្លិនមិនល្អចេញពីមណ្ឌលកែប្រែជាតិ ព្យាបាល និងស្ដារនីតិសម្បទា អ្នកញៀនគ្រឿងញៀន ខេត្តព្រះសីហនុ ក្រោយពីមានការចោទប្រកាន់ ពីស្ត្រីម្នាក់ដែលមានកូនជាអ្នកញៀនថ្នាំ ដែលកំពុងជាប់ឃុំឃាំងនៅមណ្ឌលកែប្រែមួយនេះ ថាបានទាមទារប្រាក់ពីគាត់ចំនួនពី 3500ដុល្លាទៅ3600 ដុល្លារ ជាថ្នូរនៃការដោះលែងឲ្យនៅក្រៅឃុំ និងបន្តគៀបសង្កត់គ្រប់បែបយ៉ាង ទាំងផ្លូវកាយ និងផ្លូវចិត្តទៅលើកូនរបស់អ្នកស្រី ដែលកំពុងជាប់ឃុំឃាំង ដើម្បីឲ្យយកលុយទៅលស់កូនមកវិញ។
បើយោងតាមឃ្លីបវីដេអូ និងសារសំឡេងរបស់ស្ត្រីម្នាក់ ដែលអះអាងថាខ្លួន ឈ្មោះ តាំង ស៊ីថា និងមាន ប្ដីឈ្មោះ ម៉ែន ធា មានទីលំនៅក្នុង ភូមិព្រិច ឃុំបឹងនិមលស្រុកឈូក ខេត្តកំពត បានផ្ញើមកកាន់អង្គភាពយើង ជាបន្តបន្ទាប់ និងថ្ងៃចុងក្រោយ នៅថ្ងៃទី21 ខែតុលាឆ្នាំ 2026 តាមរយៈផេកផ្លូវការHVNN TV Online ដោយបានរៀបរាប់ ទុក្ខសោកវេទនា ដែលអ្នកស្រីកំពុងទទួលរង ផលលំបាកនាពេលបច្ចុប្បន្ន ដោយសារកូនស្រីបង្កើតរបស់អ្នកស្រីជាប់ឃុំនៅមណ្ឌលបន្សាគ្រឿងញៀន នៅខេត្តព្រះសីហនុ និងទទូច ស្នើមកអង្គភាពសារព័ត៌មានយើងខ្ញុំ ឲ្យជួយផ្សព្វផ្សាយទាំងភាពក្ដុកក្ដួល ក្នុងអារម្មណ៍ថប់ណែនលាយឡំនិងសំឡេងចៅយំពីរក្រោយផងនោះ បានរៀបរាប់ថា នាពេលកន្លងមកលោកស្រី មានកូនស្រីម្នាក់ឈ្មោះ ផុន រចនា ដើរលេងភ្លើតភ្លើនជ្រុលខ្លួន ជាមួយក្រុមញៀនថ្នាំ ដោយបន្សល់កូនតូចអាយុជាង១០ខែ ត្រូវជាចៅប្រុស ទុកឱ្យគាត់មើលថែ ដោយគ្មានជម្រើស លោកស្រីបានទៅរាយការណ៍ជូនប៉ូលីស ដើម្បីឲ្យមានវិធានការជួយសង្គ្រោះ ក្រោយមកកូនអ្នកស្រី ត្រូវបានឃាត់ខ្លួន និងបញ្ជូនទៅមណ្ឌលជាតិ ព្យាបាល និងស្ដារនីតិសម្បទា អ្នកញៀនគ្រឿងញៀន ស្ថិតនៅក្នុងភូមិ រិទ្ធី២ ឃុំកែវផុស ស្រុកស្ទឹងហាវ ខេត្តព្រះសីហនុ។
អ្នកស្រី តាំង សុីថា បានបន្តទៀតថា អ្នកស្រីពិតជាអរគុណ ដល់សមត្ថកិច្ច និងប្រធានមណ្ឌលកែប្រែ ខ្លាំងណាស់ ដែលបាន ជួយកូនស្រីគាត់ ឲ្យជៀសផុតពីការញៀនថ្នាំ មកធ្វើជាមនុស្សត្រឹមត្រូវវិញ។ ក៏ប៉ុន្តែក្រោយមក ដោយនឹកឃើញថា កូនស្រីដែលកំពុងជាប់ឃុំឃាំង បានសារភាពទទួលស្គាល់កំហុស និងសន្យាជាមួយគាត់ ជាម្ដាយថា រូបគេឈប់ប្រព្រឹត្តប្រើប្រាស់គ្រឿងញៀនបន្តទៀតហើយ.! ដោយសុំមកផ្ទះវិញ ដើម្បីមើលថែកូនតូចដែលនៅបៅទឹកដោះគោនិងជួបជុំប្ដីឡើងវិញ ។
អ្នកស្រីបានបន្ថែមថា ក្នុងអំឡុងខែ 7ឆ្នាំ 2026ពោលគឺកូនអ្នកស្រីជាប់ឃុំឃាំងបានរយៈពេល ជាងពីរខែ អ្នកស្រីបានជួបបុរសម្នាក់ ជាមន្ត្រីមណ្ឌលកែប្រែដែលមានរាងធាត់ សម្បុរខ្មៅ កម្ពស់សមល្មម មិនស្គាល់ឈ្មោះ ដែលជាអ្នកកាន់សោបើកទ្វារ ចេញចូលមណ្ឌល ដោយគេបានអះអាងថារូបគេគឺជាមនុស្សជំនិតរបស់លោកម៉ូវ ប៊ុនធឿនប្រធានមណ្ឌលជាតិ ព្យាបាលនិងស្ដារនីតិសម្បទាអ្នកមានគ្រឿងញៀន នៅក្នុងឱកាសនោះ អ្នកស្រីក៏ស្នើសុំជួប និងចង់ដឹងពីព័ត៌មាន ដើម្បីចង់ឲ្យកូនមានសេរីភាពវិញ ដោយក្នុងជំនួបនោះត្រូវបានគេដាក់លក្ខខណ្ឌ ឲ្យដកទូរសព្ទចេញពីខ្លួន ទាំងអស់។.នៅក្នុងជំនួបដ៏អាក្រក់នោះ អ្នកស្រីនឹកស្មានមិនដល់សោះថា តម្លៃសិរីភាព កូនស្រីរបស់គាត់ ត្រូវបាន គេទាមទាររលុយហូតចំនូន 3500 ដុល្លារ ជាថ្នូរ នៃការដោះលែង និងមួយខែក្រោយមក ក៏បន្តឡើងថ្លៃ3,600 ដុល្លារ ដូចនៅក្នងរឿងសុវណ្ណដូងខ្ចី ចាប៉ីដងវែង បន្ទាប់ពីរូបគាត់បានតថ្លៃ សុំអោយត្រឹមមួយពាន់ 1600 ដុល្លារ (ពោលគឺតថ្លៃមួយម៉ាត់ឡើង 100 ដុល្លារ)។
មតិរិះគន់បានលើកឡើងថា បើតាមច្បាប់នៃព្រះរាជាណាចក្រកម្ពុជា ការចាកចេញពីមណ្ឌលកែប្រែ ឬមណ្ឌលស្តារនីតិសម្បទា (មណ្ឌលអប់រំកែប្រែអ្នកញៀនថ្នាំ) គឺមិនមានការតម្រូវឱ្យបង់ប្រាក់នោះឡើយ។
គ្មានកម្រៃផ្លូវការ៖ ការអនុវត្តទោស ឬការទទួលបានការស្តារ នីតិសម្បទា នៅក្នុងមណ្ឌលកែប្រែរបស់រដ្ឋ គឺជាវិធានការផ្លូវច្បាប់ និងជាសេវាសាធារណៈ។ នៅពេលដែលអ្នកទោស/អ្នកញៀនថ្នាំ បានអនុវត្តទោសចប់សព្វគ្រប់ ឬទទួលបានការអនុញ្ញាតឱ្យចាកចេញតាមផ្លូវច្បាប់ រដ្ឋមិនមានគោលការណ៍ ឬច្បាប់ណាមួយ តម្រូវឱ្យបង់ប្រាក់ដើម។
ករណីលើកលែង (ទោសពិន័យជាប្រាក់)៖ ប្រសិនបើសាលក្រម/សាលដីការបស់តុលាការ មានកំណត់ទោសបន្ថែមជា “ទោសពិន័យជាប្រាក់” ឬតម្រូវឱ្យ “សងជំងឺចិត្ត” ទៅដើមបណ្តឹង រដ្ឋប្បវេណី អ្នកពាក់ព័ន្ធត្រូវបង់ប្រាក់ទាំងនោះ ចូលថវិការដ្ឋ ឬជូនជនរងគ្រោះតាមនីតិវិធីតុលាការ (មិនមែនជាការបង់ថ្លៃសេវាចាកចេញទៅមណ្ឌលកែប្រែនោះទេ)។
តែប្រសិនបើមានបុគ្គល ឬមន្ត្រីណាមួយទារប្រាក់សម្រាប់ការដោះលែង ឬការចេញពីមណ្ឌលកែប្រែ ដែលខុសពីសាលក្រមតុលាការ នោះគឺជាអំពើខុសច្បាប់ (អំពើពុករលួយ) មហាជនមានឆ្ងល់ថា មូលហេតុអ្វីមន្ត្រីទាំងនោះហាមាត់ទាមទារប្រាក់ពីប្រជាពលរដ្ឋជាថ្នូរ និងការដោះលែង ចំនួន 3.600 ដុល្លារ តាមទំនើងចិត្តហាក់បីដូចមិនខ្លាច និងទុកច្បាប់នៅក្នុងចិត្តបន្តិចសោះឡើយ។
ជាចុងក្រោយអ្នកស្រី តាំង ស៊ីថា ដែលត្រូវជាម្ដាយ របស់ស្ត្រីឈ្មោះ ផុន រចនាដែលកំពុង ជាប់ឃុំឃាំង នៅមណ្ឌលបន្សាបគ្រឿងញៀន បានលើកដៃសំពះអំពាវនាវដល់ ថ្នាក់ដឹកនាំគ្រប់ជាន់ថ្នាក់ជាពិសេស លោក ឧត្តមសេនីយ៍ឯក ស រដ្ឋា ស្នងការនគរបាល ខេត្តសីហនុ និងឯកឧត្ត ម៉ាង ស៊ីណេត អភិបាលនៃគណៈអភិបាលខេត្តព្រះសីហនុជួយអន្តរាគមន៍ ឱ្យទាន់ពេលវេលាផង ព្រោះរូបអ្នកស្រីកំពុងជួបទុក្ខធំ ។បច្ចុប្បន្នប្រឈមទៅនឹងជីវភាព យ៉ាងធ្ងន់ធ្ងរ ព្រោះអ្នកស្រីពុំមានលទ្ធភាព ចិញ្ចឹមចៅដែលកំពុងបំបៅទឹកដោះគោនោះឡើយ ហើយមានពេលខ្លះអ្នកស្រីបង្ខំចិត្តយកទឹកបបរជំនួសធ្វើជាទឹកដោះគោវិញមូលហេតុនេះធ្វើឲ្យចៅប្រុសរបស់អ្នកស្រីប្រឈមទៅនឹងសុខភាពមានពេលខ្លះមានជម្ងឺរាគនិងក្តៅខ្លួនផងក៏មាន។
នៅព្រឹកថ្ងៃទី២២ ខែតុលា ឆ្នាំ២០២៦ លោក.ម៉ូវ ប៊ុន ធឿន.ប្រធានមណ្ឌល
កែប្រែជាតិ ព្យាបាលនិងស្ដារនីតិសម្បទាអ្នកញៀនគ្រឿងញៀន ខេត្តព្រះសីហនុបានឱ្យអង្គភាពសារព័ត៌មានយើងដឹងតាមទូរសព្ទថាករណីអ្នកស្រីតាំង ស៊ីថាដែលមានកូនស្រីឈ្មោះផុនរចនាដែលកំពុងជាប់ឃុំឃាំងដើម្បីបន្សាបគ្រឿងញៀននោះ គឺលោកធ្វើទៅតាមនីតិវិធីច្បាប់របស់មណ្ឌលពោលគឺអ្នកដែលត្រូវព្យាបាលត្រូវប្រើរយៈពេលយ៉ាងតិចពី 6 ខែទៅ 2 ឆ្នាំចំណែកកូនអ្នកស្រីតាំងស៊ីថាទើបតែជាប់រយៈពេល 2 ខែជាងគាត់មកស្នើសុំយកទៅវិញគឺខុសនីតិវិធីរីឯចំណុចទី 2 ដែលចោទថាក្រុមការងារលោកបានទាមទារប្រាក់ 3600 ដុល្លារនោះមិនមែនជាការពិតឡើយ។ទោះបីជាមានការបកស្រាយនិងបដិសេធយ៉ាងនេះក្តីអ្នកស្រីតាំង សុីថាបានអះអាងថាអ្នកស្រីហ៊ានទទួលខុសត្រូវចំពោះមុខច្បាប់និងហ៊ានតទល់ចំពោះបុគ្គលដែលទារលុយគាត់មានពេលកន្លងទៅ។
ចំណែក លោកឧត្តមសេនីយ៍ឯកស រដ្ឋាស្នងការនគរបាលខេត្តព្រះសីហនុក្រុមការងារយើងបានធ្វើការទំនាក់ទំនងតាមលេខទូរសព្ទក៏ប៉ុន្តែខលចូលមិនមានអ្នកទទួល។
ដោយឡែកឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ
អង្គភាពយើងអង្គរមិនអាចសុំសេចក្តីអត្ថាធិប្បាយបានដែរ។ដោយយើងព្យាយាមខលទូរសព្ទចំនួនពីរដងតែមិនមានអ្នកទទួល៕
រឿងរ៉ាវខាងលើ វាបីដូចជាពាក្យចាស់លោកពោលថា(ប្រុសប្រកែកស្រីប្រកាន់)ត្រង់ថាពិតឬមិនពិតនោះពលរដ្ឋអ្នកឃ្លាំមើលស្នើដល់មន្ទីរអង្គភាពជំនាញអាជ្ញាធរខេត្តគ្រប់ជាន់ថ្នាក់មេត្តាចុះធ្វើអធិការកិច្ចស្រាវជ្រាវទៅលើភាពមិនប្រក្រតីខាងលើដើម្បីស្វែងរកការពិតផងចុះទាន។
អង្គភាពយើងនៅតែរង់ចាំការបកស្រាយបំភ្លឺពីភាគគីពាក់ព័ន្ធរៀងរម៉ោងធ្វើការតាមរបប ស្ដីអំពីច្បាប់សារព៌តមាននៃព្រះរាជាណាចក្រកម្ពុជា៕
